លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បានរម្លឹកដល់មន្ត្រីច្រកទ្វារព្រំដែនទាំងអស់ត្រូវបន្តរក្សាឥរិយាបថទន់ភ្លន់ មានក្រមសីលធម៌ និងវិជ្ជាជីវៈខ្ពស់ កុំប្រព្រឹត្តអំពើមិនល្អ ខណៈពេលបំពេញការងារ។ លោក ថា មន្ត្រីច្រកទ្វារព្រំដែនត្រូវតែផ្ដល់ភាពកក់ក្តៅដល់ភ្ញៀវទេសចរ និងអ្នកវិនិយោគ។

លោក ស សុខា បានលើកឡើងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារស្នាក់នៅកម្ពស់៥ជាន់ នៃប៉ុស្តិ៍នគរបាលច្រកទ្វារព្រំដែនអន្តរជាតិបាវិត ខេត្តស្វាយរៀង កាលពីថ្ងៃទី២១ ខែតុលា ឆ្នាំ២០២៦ ដោយណែនាំយ៉ាងម៉ឺងម៉ាត់ដល់មន្ត្រីនគរបាលច្រកទ្វារព្រំដែនអន្តរជាតិ ក៏ដូចជាមន្ត្រីនៃអគ្គនាយកដ្ឋានអន្តោប្រវេសន៍ទាំងអស់ដែលជាកម្លាំងជួរមុខត្រូវតែប្រកាន់ខ្ជាប់នូវឥរិយាបថទន់ភ្លន់ សុភាពរាបសារ ពោរពេញដោយក្រមសីលធម៌ និងវិជ្ជាជីវៈខ្ពស់ក្នុងការបំពេញការងារ ដោយត្រូវចៀសវាងឱ្យបាននូវការប្រព្រឹត្តអំពើមិនល្អផ្សេងៗដែលប៉ះពាល់ដល់កិត្តិយសអង្គភាព។

លោក បានគូសបញ្ជាក់បន្ថែមថា មន្ត្រីអន្តោប្រវេសន៍នៅតាមច្រកទ្វារព្រំដែន និងអាកាសយានដ្ឋាននានា គឺជាមុខមាត់ដំបូងបង្អស់នៃប្រទេសជាតិ ដែលភ្ញៀវទេសចរ និងអ្នកវិនិយោគទុនបរទេសបានជួបប្រទះមុនគេ ពេលឈានជើងចូលមកកាន់កម្ពុជា។ លោក សង្កត់ធ្ងន់ថា ការបង្ហាញនូវស្នាមញញឹម ភាពរួសរាយរាក់ទាក់ និងការសម្រួលនីតិវិធីប្រតិបត្តិការងារឱ្យបានឆាប់រហ័ស ត្រឹមត្រូវ តាមច្បាប់ មិនត្រឹមតែបង្កើតនូវបរិយាកាសកក់ក្តៅ និងការចាប់អារម្មណ៍ល្អដល់ភ្ញៀវបរទេសប៉ុណ្ណោះទេ ប៉ុន្តែថែមទាំងរួមចំណែកយ៉ាងសំខាន់ក្នុងការលើកកម្ពស់កិត្តិយស កិត្យានុភាពជាតិ និងជំរុញវិស័យទេសចរណ៍ និងការវិនិយោគនៅកម្ពុជាឱ្យកាន់តែរីកចម្រើនឡើងថែមទៀត។

ថ្លែងចេញពីច្រកទ្វារព្រំដែនអន្តរជាតិដដេលនោះ ប្រមុខក្រសួងមហាផ្ទៃ ក៏បានផ្តល់អនុសាសន៍ផ្ដាំផ្ញើដល់មន្ត្រីទាំងអស់ ត្រូវថែរក្សាសមិទ្ធផលអគារស្នាក់នៅថ្មីនេះឱ្យបានល្អ ដើម្បីប្រើប្រាស់បានយូរអង្វែង ព្រមទាំងត្រូវបន្តពង្រឹងសមត្ថភាព ចំណេះដឹងភាសាបរទេស និងបច្ចេកវិទ្យា ដើម្បីឆ្លើយតបឱ្យទាន់ពេលវេលាទៅនឹងការអភិវឌ្ឍ និងការរីកចម្រើននៃកិច្ចការអន្តោប្រវេសន៍ក្នុងយុគសម័យឌីជីថលនេះផងដែរ៕