ក្រចេះ៖ ឯកឧត្តម សរ ចំរុង ប្រធានគណៈកម្មការសិទ្ធិមនុស្ស ទទួលពាក្យបណ្តឹងនិងអង្កេត និងអធិការកិច្ចច នៃរដ្ឋសភា និងឯកឧត្តមបណ្ឌិត​ សុខ​ សាវ៉ាត​ ទីប្រឹក្សា​ផ្ទាល់​សម្តេច​មហារដ្ឋសភាធិការធិបតី​ ឃួន​ សុដារី​ ប្រធានរដ្ឋសភា និងតំណាងរាស្ត្រ​មណ្ឌលខេត្តក្រចេះ នាព្រឹកថ្ងៃទី២៤ ខែកក្កដា ឆ្នាំ២០២៦ បានអញ្ជើញ​នាំយកទៀនព្រះវស្សា និងទេយ្យទាន ប្រគេនព្រះសង្ឃដែលគង់ចាំ​វស្សា​នៅវត្តចំនួន ៥ ស្ថិតក្នុងឃុំចំបក់ ស្រុកព្រែកប្រសព្វ ខេត្តក្រចេះ។
នៅក្នុងឱកាសនោះ ឯកឧត្តម សរ ចំរុង បានអុជធូបទៀន និងថ្វាយផ្កាភ្ញី ដើម្បី​រំលឹកដល់គុណបុណ្យព្រះរតនត្រ័យទៅតាមគន្លងប្រពៃណីព្រះពុទ្ធសាសនា ព្រម​ទាំងបានឧទ្ទិសកុសលផលបុណ្យជូនដល់វិញ្ញាណក្ខន្ធបុព្វការីជន វីរយុទ្ធជន​ស្នេហាជាតិ និងញាតកាទាំង ៧សណ្ដាន ដែលបានចែកឋាន​ទៅ​កាន់​បរលោក សូមឲ្យបានទៅសោយសុខក្នុងទីឋានសុគតិភព កុំបីឃ្លៀង​ឃ្លាតឡើយ។
ទេយ្យទានដែលជាសទ្ធាជ្រះថ្លារបស់ ឯកឧត្តម សរ ចំរុង សម្រាប់​ប្រគេន​ព្រះសង្ឃ វត្តទាំង ៥ នោះ ក្នុងមួយវត្តៗទទួលបាន៖ ទៀនព្រះវស្សា ១គូ អង្ករ១០០គីឡូក្រាម មី៥កេស ទឹកបរិសុទ្ធ៥កេស ត្រីខ ១កេស ទឹកស៊ីអ៊ីវ ១យួរ ទឹកត្រី ១យួរ ស្ករស ១គីឡូក្រាម ទឹកដោះគោ ១០កំប៉ុង និងបច្ច័យ ២០ម៉ឺនរៀល។ ទន្ទឹមនឹងនេះ ឯកឧត្តមក៏បានឧបត្ថម្ភថវិកាជូនដល់យាយជី និងតាជីចំនួន ៥៧នាក់ ដោយក្នុងម្នាក់ៗទទួលបាន ២០,០០០រៀល ផងដែរ។
សូមជម្រាបជូនថា ពិធីបុណ្យចូលព្រះវស្សា គឺជាបុណ្យប្រពៃណីមួយដែល​មានសារៈសំខាន់ខ្លាំងក្នុងព្រះពុទ្ធសាសនា ហើយជា​ពេលវេលា​ដ៏ថ្លៃថ្លា​សម្រាប់​ភិក្ខុសង្ឃ និងសាមណេរ សិក្សារៀនសូត្រធម៌វិន័យយ៉ាង​ខ្ជាប់ខ្ជួន​តាមពុទ្ធឱវាទ។ ពុទ្ធសាសនិកជនតែងតែនាំយកសាដក អង្ករ ភេសជ្ជៈ និងទេយ្យទានផ្សេងៗ ទៅប្រគេនព្រះសង្ឃតាមសទ្ធាជ្រះថ្លារៀងៗខ្លួន។ ពិធីបុណ្យចូលព្រះវស្សាតែងប្រារព្ធធ្វើឡើងជារៀងរាល់ឆ្នាំ ចាប់ពីថ្ងៃ ១រោច ខែអាសាធ ដល់ថ្ងៃ ១៥កើត ខែអស្សុជ៕