(ត្បូងឃ្មុំ)៖ លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នារសៀលថ្ងៃទី២៥ ខែសីហា ឆ្នាំ២០២៦ បានដឹកនាំថ្នាក់ដឹកនាំក្រសួង មន្ត្រីបច្ចេកទេស និងមន្ត្រីមន្ទីរអភិវឌ្ឍន៍ជនបទខេត្តត្បូងឃ្មុំ ចុះពិនិត្យជាក់ស្តែងស្ថានភាពផ្លូវជនបទចំនួន ៣ខ្សែ ដែលជាប្រភេទផ្លូវក្រាលកៅស៊ូពីរជាន់ (DBST) និងកំពុងរងការខូចខាតធ្ងន់ធ្ងរ និងត្រូវជួលជុលបន្ទាន់ស្ថិតក្នុងខេត្តត្បូងឃ្មុំ។

ផ្លូវទាំង ៣ខ្សែដែលបានចុះពិនិត្យរួមមាន៖
ខ្សែទី១៖ ឈ្មោះផ្លូវភូមិខ្នុរ-ស្រែវែង មានប្រវែង ២២គីឡូម៉ែត្រ តភ្ជាប់ពីភូមិខ្នុរ ឃុំនាងទើត ទៅភូមិស្រែវែង ឃុំទឹកជ្រៅ និងបន្តទៅរមណីយដ្ឋានទឹកធ្លាក់ហោង នៃភូមិលោ ឃុំកំពាន់ ស្រុកមេមត់ ខេត្តត្បូងឃ្មុំ។ ខ្សែផ្លូវនេះមានអ្នកទទួលផលដោយផ្ទាល់ចំនួន ៧ ៤១៤គ្រួសារ ស្មើនឹង ៣០ ៧៤៦នាក់ និងអ្នកទទួលផលដោយប្រយោលចំនួន ៥៩ ០៥២គ្រួសារ ស្មើនឹង ២៥៤ ២១៨នាក់។ ផ្លូវមួយខ្សែនេះ ត្រូវបានស្ថាបនាក្នុងឆ្នាំ២០១៩ ដោយក្រសួងអភិវឌ្ឍន៍ជនបទ ក្នុងក្របខ័ណ្ឌគម្រោងកែលម្អផ្លូវជនបទជំហាន២។

ខ្សែទី២៖ ឈ្មោះផ្លូវ ចុងជាច-បង្ហើរខ្លែង មានប្រវែង ១១គីឡូម៉ែត្រ តភ្ជាប់ពីទីប្រជុំជន ឃុំចុងជាច ទៅភូមិបង្ហើរខ្លែង ឃុំត្រពាំងព្រីង ស្រុកតំបែរ ខេត្តត្បូងឃ្មុំ។ ផ្លូវនេះមានអ្នកទទួលផលដោយផ្ទាល់ចំនួន ៧ ១៨៤គ្រួសារ ស្មើនឹង ២២ ៨៨៨នាក់ និងអ្នកទទួលផលដោយប្រយោលចំនួន ២១ ៥៨៣គ្រួសារ ស្មើនឹង ៩៥ ១៩២នាក់។ ផ្លូវមួយខ្សែនេះ ត្រូវបានស្ថាបនាជាពហុឆ្នាំ ចាប់ពីឆ្នាំ២០២០ ដល់ឆ្នាំ២០២២ ដោយនាយកដ្ឋានផ្លូវជនបទ ក្រសួងអភិវឌ្ឍន៍ជនបទ។

ខ្សែទី៣៖ ឈ្មោះផ្លូវ ស្ទឹង-គោកចារ មានប្រវែង២២,៦៥គីឡូម៉ែត្រ តភ្ជាំប់ពីផ្លូវជាតិលេខ៧ ត្រង់ចំណុចភូមិស្ទឹង ឃុំកោងកាង ស្រុកពញាក្រែក ទៅភ្ជាប់នឹងផ្លូវជាតិលេខ៧៣ ត្រង់ភូមិគោកចារ ឃុំគោកស្រុក ស្រុកតំបែរ ខេត្តត្បូងឃ្មុំ។ ផ្លូវនេះមានអ្នកទទួលផលដោយផ្ទាល់ចំនួន ៩ ៧១៥គ្រួសារ ស្មើនឹង ៤៣ ៨៦០នាក់ និងអ្នកទទួលផលដោយប្រយោលចំនួន ៦០ ០៦៨គ្រួសារ ស្មើនឹង ២៥៧ ៧៥៥នាក់។ ផ្លូវមួយខ្សែនេះ ត្រូវបានស្ថាបនាជាពហុឆ្នាំ ចាប់ពីឆ្នាំ២០១៨ ដល់ឆ្នាំ២០២១ ដោយកងវិស្វកម្មក្រសួងការពារជាតិ ក្រោមអាណាប័កក្រសួងអភិវឌ្ឍន៍ជនបទ។

គួរជម្រាបជូនដែរថា លោករដ្ឋមន្ដ្រី ដឹកនាំមន្ដ្រីបច្ចេកទេសអញ្ជើញចុះត្រួតពិនិត្យផ្លូវនាឱកាសនោះ ដើម្បីពិនិត្យស្ថានភាពជាក់ស្ដែងនូវ ទំហំនៃការទទួលរងការខូចខាត ដែលបង្កផលវិបាកដល់ការធ្វើដំណើរ និងការដឹកជញ្ជូនកសិផលរបស់ប្រជាពលរដ្ឋ។ តាមរយៈការចុះពិនិត្យជាក់ស្ដែង លោករដ្ឋមន្ដ្រី បានចង្អុលបង្ហាញដល់នាយកដ្ឋានអភិវឌ្ឍន៍ហេដ្ឋារចនាសម្ព័ន្ធផ្លូវជនបទ និងមន្ទីរអភិវឌ្ឍន៍ជនបទខេត្តត្បូងឃ្មុំ ពិនិត្យលទ្ធភាពដាក់បញ្ចូលខ្សែផ្លូវទាំង ៣ខ្សែនេះ ទៅក្នុងផែនការស្ដារឡើងវិញ ឬផែនការថែទាំខួប ផ្អែកតាមស្ថានភាពជាក់ស្តែងនាឆ្នាំបន្ទាប់ របស់ក្រសួងអភិវឌ្ឍន៍ជនបទ៕