តម្លៃប្រេងឆៅអន្តរជាតិបានធ្លាក់ចុះជាង ១ ដុល្លារ/បារ៉ែល នៅព្រឹកថ្ងៃចន្ទនេះ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានសម្រេចលើកលែងទណ្ឌកម្ម​សេដ្ឋកិច្ចរុស្ស៊ី ដែលអាចបើកផ្លូវឱ្យមានការនាំចេញប្រេងពីរុស្ស៊ីកាន់តែច្រើន ​ទោះបីជាកង្វល់​ផ្នែកផ្គត់ផ្គង់នៅតែបន្ត​។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅ Brent បានធ្លាក់ចុះ ១,៤៣ ដុល្លារ ឬ ១,៣% មកនៅត្រឹម ១០៨,៤៣ ដុល្លារ/បារ៉ែល គិតត្រឹមម៉ោង ៧ កន្លះ នៅទីក្រុងហុងកុង ក្រោយបិទការជួញដូរកាលពីថ្ងៃសុក្រ ក្នុងកម្រិតខ្ពស់បំផុតចាប់តាំងពីថ្ងៃទី១៩ ខែឧសភា។ ចំណែកតម្លៃប្រេងឆៅអាមេរិក West Texas Intermediate (WTI) បានធ្លាក់ចុះ ៥៣ សេន ឬ ០,៥២% មកនៅត្រឹម ១០០,៨៨ ដុល្លារ/បារ៉ែល។

ការធ្លាក់ចុះនេះកើតឡើង បន្ទាប់ពីលោក ត្រាំ បានចុះហត្ថលេខាលើបទបញ្ជាប្រតិបត្តិកាលពីថ្ងៃសុក្រ ដើម្បីលើកលែងទណ្ឌកម្ម និងពន្ធសំខាន់ៗមួយចំនួនក្រោមច្បាប់ «Graham Act» ​រយៈពេល ៦០ ថ្ងៃ​។ វិធានការនេះអាចជួយសម្រួលដល់ការនាំចេញប្រេងពីរុស្ស៊ី និងបង្កើនការផ្គត់ផ្គង់ប្រេងនៅលើទីផ្សារអន្តរជាតិ។

​យ៉ាងណាមិញ រដ្ឋមន្ត្រីការបរទេសអាមេរិក លោក ម៉ាកូ រូប៊ីអូ បានឱ្យដឹងថា លោក ត្រាំ នឹងប្រើពេលរហូតដល់ ៦០ ថ្ងៃ ដើម្បីវាយតម្លៃផលប៉ះពាល់សេដ្ឋកិច្ចពីការលើកលែងនេះ។ ចំណែកប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានព្រមានថា សកម្មភាពរបស់អាមេរិកទាំងនេះ អាចប៉ះពាល់ដល់អ៊ុយក្រែន។

ទន្ទឹមនឹង​នោះ ភាពតានតឹងនៅមជ្ឈិមបូព៌ានៅតែជាកត្តាសំខាន់ដែលធ្វើឱ្យទីផ្សារប្រេងមានភាពមិនប្រាកដប្រជា។ កាលពីថ្ងៃសុក្រ តម្លៃប្រេង Brent បានហក់ឡើង​ទៅកិតនឹង ១១០ ដុល្លារ/បារ៉ែល ​ដោយ​សារ​កង្វល់អំពីសុវត្ថិភាពនៃការដឹកជញ្ជូន​ប្រេងពីមជ្ឈិមបូព៌ា​។

យោងតាមក្រុមហ៊ុនវិភាគទីផ្សារថាមពល Kpler ការដឹកជញ្ជូនប្រេងឆៅចេញពីតំបន់ឈូងសមុទ្រពែរ្សបានធ្លាក់ចុះយ៉ាងខ្លាំងកាលពីសប្ដាហ៍មុន ដោយសារតែកំណើនការវាយប្រហារលើនាវាពាណិជ្ជកម្ម​។ ​ប្រេងប្រមាណ ៨,៥ លានបារ៉ែល/ថ្ងៃ ត្រូវដឹកជញ្ជូនចេញ បើធៀបនឹងជាង ២០ លានបារ៉ែល/ថ្ងៃ នៅសប្ដាហ៍មុននោះ។ ក្នុងអំឡុងពេលដូចគ្នា មានករណីវាយប្រហារ ឬហេតុការណ៍ប៉ះពាល់ដល់នាវាពាណិជ្ជកម្មយ៉ាងហោចណាស់ ១០ ករណីផងដែរ។

បន្ថែមពីនេះ ស្ថានការណ៍សន្តិសុខក្នុងតំបន់អាចកាន់តែតានតឹង បន្ទាប់ពីអេហ្ស៊ីបបានប្រកាសថា ខ្លួនត្រៀមផ្តល់ការគាំទ្រដល់អារ៉ាប៊ីសាអូឌីត ដើម្បីការពារសន្តិសុខ និងស្ថិរភាពរបស់ប្រទេសនេះ ប្រឆាំងនឹងក្រុមហ៊ូ​ធីនៅយេម៉ែន ដែលមានទំនាក់ទំនងជាមួយអ៊ីរ៉ង់។

​អ្នកជំនាញលើកឡើងថា ស្ថានភាពទាំងអស់នៅ មានន័យថា តម្លៃប្រេងអាចនឹងបន្តនៅខ្ពស់ក្នុងរយៈពេលវែង ចំពេលដែលជម្លោះអាមេរិក និងអ៊ីរ៉ង់ បន្តអូសបន្លាយ៕