រុស្ស៊ី លួចជួយអ៊ីរ៉ង់អភិវឌ្ឍមីស៊ីលល្បឿនលឿនជាងសំឡេងដោយសម្ងាត់ សម្រាប់ប្រឆាំំងអាមេរិកក្នុងសង្គ្រាម
September 3, 2026
រុស្ស៊ីបានជួយអ៊ីរ៉ង់ដោយសម្ងាត់ក្នុងការអភិវឌ្ឍមីស៊ីលល្បឿនលឿនជាងសំឡេង ដែលអាចគំរាមកំហែងដល់នាវាចម្បាំងអាមេរិកនៅមជ្ឈិមបូព៌ា។
យោងតាមកាសែត Financial Times ផ្សាយនៅថ្ងៃទី០២ ខែកញ្ញា ឆ្នាំ២០២៦ អ្នកជំនាញនិយាយថា ការផ្ទេរបច្ចេកវិទ្យាយោធាទៅឲ្យទីក្រុងតេហេរ៉ង់ គឺត្រូវតែមានការអនុញ្ញាតពីថ្នាក់ដឹកនាំកំពូលនៃវិមានក្រឹមឡាំង។
កម្មវិធីនេះ ត្រូវបានសន្មតិឈ្មោះ «C340L» បានចាប់ផ្តើមនៅឆ្នាំ ២០២៣ ហើយបានបន្តពេញមួយសង្គ្រាមរបស់សហរដ្ឋអាមេរិកប្រឆាំងនឹងអ៊ីរ៉ង់ ដែលអាចបង្កើនលទ្ធភាពប្រឆាំងនឹងនាវាផ្ទុកយន្តហោះ និងនាវាចម្បាំងផ្សេងទៀតរបស់សហរដ្ឋអាមេរិកដែលប្រតិបត្តិការក្នុងសង្គ្រាមនៅមជ្ឈិមបូព៌ា ហើយអាចត្រូវបានកំណត់គោលដៅ។
កម្មវិធីនេះ ក៏ជួយអ៊ីរ៉ង់អភិវឌ្ឍប្រព័ន្ធរុញច្រាន ramjet ដែលជាម៉ាស៊ីនសម្រាប់អនុញ្ញាតឱ្យមីស៊ីលហោះលឿនជាងល្បឿនសំឡេង។
លោក Jim Lamson អតីតអ្នកវិភាគយោធានៃ CIA សហរដ្ឋអាមេរិក និយាយថា៖ «សម្រាប់ជនជាតិអ៊ីរ៉ង់ កម្មវិធីនេះនឹងផ្តល់ឱ្យពួកគេនូវប្រព័ន្ធអាវុធយុទ្ធសាស្ត្រថ្មីដែលមានគុណភាព ហើយអាចគំរាមកំហែងដល់នាវាកងទ័ពជើងទឹកអាមេរិក។ មីស៊ីលល្បឿនលឿនជាងសំឡេង ពិបាកស្ទាក់ចាប់ខ្លាំងណាស់ ពីព្រោះវាហោះនៅរយៈកម្ពស់ទាប ដើម្បីលាក់ខ្លួនពីរ៉ាដា ក្នុងល្បឿនរហូតដល់ ៣ ៥៤០គីឡូម៉ែត្រក្នុងមួយម៉ោង»។
យ៉ាងណា ទោះបីជាអ៊ីរ៉ង់បានសាងសង់ និងសាកល្បងប្រព័ន្ធរុញច្រាន ramjet ក៏ដោយ ក៏មិនមានភស្តុតាងណាមួយ បង្ហាញថា វាត្រូវបានដាក់ពង្រាយនៅក្នុងសមរភូមិនោះទេ។
លោក Fabian Hinz អ្នកជំនាញខាងមីស៊ីលអ៊ីរ៉ង់ និយាយថា៖ « កម្មវិធីនេះ គឺជាការផ្ទេរបច្ចេកវិទ្យាយោធាដ៏រសើបខាងយុទ្ធសាស្ត្រខ្ពស់ពីប្រទេសរុស្ស៊ី ដែលអ៊ីរ៉ង់ចង់ទទួលបានអស់រយៈពេលជាច្រើនទសវត្សរ៍មកហើយ។ កម្មវិធីបែបនេះនឹងតម្រូវឱ្យមានការយល់ព្រមពីថ្នាក់លើក្នុងប្រទេសរុស្ស៊ី»។
គួរបញ្ជាក់ថា របបអ៊ីរ៉ង់បានផ្គត់ផ្គង់ដ្រូន Shahed kamikaze របស់ខ្លួនដល់ទីក្រុងមូស្គូសម្រាប់ការទម្លាក់គ្រាប់បែកពេលយប់លើទីក្រុងអ៊ុយក្រែន ខណៈរុស្ស៊ីបានផ្តល់ព័ត៌មានស៊ើបការណ៍សម្ងាត់ដែលអនុញ្ញាតឱ្យទីក្រុងតេហេរ៉ង់ វាយប្រហារមូលដ្ឋានទ័ពអាមេរិកនៅមជ្ឈិមបូព៌ា៕