សម្ដេច ឃួន សុដារី ជំរុញដល់មន្ត្រីប្រើ AI ជាការជំនួយ តែក៏ត្រូវបង្កើនសមត្ថភាពនៃចំណេះដឹងរបស់ខ្លួនផងដែរ
October 20, 2026
ប្រធានសភាកម្ពុជា សម្ដេចសភាធិបតី ឃួន សុដារី បានជំរុញដល់សមាជិកសភា និងមន្ត្រីរដ្ឋបាលទាំងអស់ឱ្យសិក្សានិងប្រើប្រាស់បច្ចេកវិទ្យា AI ជាមួយនឹងការបង្កើនសមត្ថភាពចំណេះដឹងរបស់ខ្លួន។ សម្ដេចថាការប្រើ AI ជារឿងល្អតែអ្នកប្រើប្រាស់ក៏ត្រូវមានសមត្ថភាពវិភាគយល់ដឹងពីព័ត៌មានដែល AI បានផ្ដល់ផងដែរ។
ថ្លែងក្នុងពិធីបើកសិក្ខាសាលាពិគ្រោះយោបល់ស្ដីពី ការអភិវឌ្ឍសភាអេឡិចត្រូនិក នៅសាលសន្និសីទសភា ព្រឹកថ្ងៃទី១៩ ខែតុលា ឆ្នាំ២០២៦ សម្ដេចសភាធិបតី ឃួន សុដារី មានប្រសាសន៍ថា ការវិវត្តន៍នៃបច្ចេកវិទ្យា បញ្ញាសិប្បនិមិត្ត AI តម្រូវឱ្យមនុស្សត្រូវចាប់យកឱ្យទាន់នូវការរីកចម្រើននេះដើម្បីបម្រើនូវប្រយោជន៍ការងាររបស់ខ្លួន យ៉ាងណាក្ដីក៏ត្រូវមានសមត្ថភាពវិភាគ និងព័ត៌មានផងដែរ ព្រោះថាព័ត៌មានដែល AI បានផ្ដល់ឱ្យមួយចំនួនមិនប្រាដកថាជាក់លាក់នោះទេ។
សម្ដេចបន្ថែមថា៖ «ក្រសួងណាក៏ដូចក្រសួងណាដែរគេប្រើ AI គ្រាន់តែគេធ្វើជាម្ចាស់លើ AI។ [..] តែបើយើងប្រើវាទាំងអស់ដោយមិនយកការងារជាក់ស្ដែងទៅបំពេញបន្ថែមគឺអត់ទេ។ ជាក់ស្ដែងវាឆ្លាត វាចេះជួយយើង វាជាសេនាធិការជួយយើងតែបើវាទាំងស្រុងដោយយើងគ្មានចំណេះដឹងខាងហ្នឹងប្រាកដទៅហើយ»។
បើតាមសម្ដេចសភាធិបតីបច្ចុប្បន្នមន្ត្រីរាជការដែលបម្រើការនៅសភាជាតិមានប្រមាណ ១ ៣០០នាក់។
ក្នុងឱកាសនោះដែរសម្ដេចក៏បានបញ្ជាក់ពីការប្រែខ្លួនរបស់សភាកម្ពុជាទៅជាសភាឌីជីថលនាពេលខាងមុខឆ្លើយតបនឹងភាពចាំបាច់ក្នុងការលើកកម្ពស់តម្លាភាព គណនេយ្យភាព និងប្រសិទ្ធភាពនៃការផ្ដល់សេវាសាធារណៈ ក៏ដូចជាការងារនីតិប្បញ្ញត្តិ។ ការធ្វើបរិវត្តកម្មនេះ គឺជាកម្លាំងចលករដ៏សំខាន់ក្នុងការលុបបំបាត់របាំងការិយាធិបតេយ្យ កាត់បន្ថយការប្រើប្រាស់ក្រដាស សន្សំសំចៃពេលវេលា ព្រមទាំងជាស្ពានតភ្ជាប់ប្រកបដោយនវានុវត្តន៍ក្នុងការធ្វើឱ្យស្ថាប័នសភាកាន់តែមានភាពរហ័សរហួន និងរស់រវើកក្នុងការឆ្លើយតបទៅនឹងតម្រូវការរបស់ប្រជាពលរដ្ឋ៕
