ប្រធានាធិបតីអាមេរិក ដូណាល់ ត្រាំ កាលពីថ្ងៃទី១៩ ខែតុលា បានព្យាករណ៍ថា នាយករដ្ឋមន្ត្រីអ៊ីស្រាអែល លោក ប៊េនចាមីន ណេតាន់យ៉ាហ៊ូ នឹងទទួលបាន «ជ័យជម្នះយ៉ាងធំធេង» នៅក្នុងការបោះឆ្នោត ខណៈដែលមេដឹកនាំអ៊ីស្រាអែលរូបនេះបានបន្លុយពាក្យថា ពួកគេទាំងពីរអាចនឹងរួមដៃគ្នាវាយប្រហារលើអ៊ីរ៉ង់ម្តងទៀត។ នេះបើយោងទៅតាមសារព័ត៌មាន A News របស់តួកគី។តែមួយថ្ងៃប៉ុណ្ណោះបន្ទាប់ពីលោក ត្រាំ បានប្រកាសគាំទ្រលោក ណេតាន់យ៉ាហ៊ូ ជាសាធារណៈសម្រាប់ការបោះឆ្នោតដ៏ប្រកៀកប្រកិតនៅថ្ងៃទី២៧ ខែតុលា នាយករដ្ឋមន្ត្រីអ៊ីស្រាអែលបានបញ្ចេញវីដេអូមួយ បង្ហាញពីការសន្ទនាតាមទូរស័ព្ទដែលមេដឹកនាំស្តាំនិយមទាំងពីររូបនេះបានសរសើរគ្នាទៅវិញទៅមក។

នៅក្នុងវីដេអូនោះ លោក ត្រាំ បាននិយាយ ខណៈពេលដែលលោក ណេតាន់យ៉ាហ៊ូ បើកសំឡេងទូរស័ព្ទខ្លាំងថា «តាមពិតទៅ ខ្ញុំគិតថាអ្នកនឹងទទួលបានជ័យជម្នះយ៉ាងធំធេង»។ លោក ត្រាំ បានបន្ថែមដោយហៅឈ្មោះក្រៅរបស់លោក ណេតាន់យ៉ាហ៊ូ ថា «អ្នកគឺជាបុរសដែលខ្ញុំចង់ឱ្យនៅក្បែរខ្ញុំ ប៊ីប៊ី (Bibi)»។

ចំណែកឯលោក ណេតាន់យ៉ាហ៊ូ បាននិយាយតបទៅវិញភ្លាមៗថា «ដូណាល់ យើងមានការងារដែលត្រូវបញ្ចប់! យើងនឹងបញ្ចប់វាជាមួយគ្នា ហើយគ្មានអ្នកណាម្នាក់អាចធ្វើវាបានឡើយ។ អ្នកគឺជាមិត្តដ៏ល្អបំផុត និងអស្ចារ្យបំផុតដែលអ៊ីស្រាអែលមិនធ្លាប់មានពីមុនមក»។

យ៉ាងណាក៏ដោយ លោក ណេតាន់យ៉ាហ៊ូ មិនបានពន្យល់លម្អិតបន្ថែមនោះទេ ប៉ុន្តែលោកបានពណ៌នាជាថ្មីម្តងទៀតថា របបដឹកនាំសាសនារបស់អ៊ីរ៉ង់ ដែលនៅតែបន្តកាន់អំណាចអស់រយៈពេលជិត ៨ខែ បន្ទាប់ពីការវាយប្រហាររួមគ្នាដ៏ធំធេងនោះ គឺជាគ្រោះថ្នាក់ដ៏ធំបំផុត។

បើទោះបីជាលោក ណេតាន់យ៉ាហ៊ូ បានរំឭកប្រធានាធិបតីអាមេរិកដែលល្បីខាងនិយាយស្តីមិនសូវប្រយ័ត្នរូបនេះថា ពួកគេកំពុងនិយាយគ្នាតាមខ្សែទូរស័ព្ទដែលបើកចំហក៏ដោយ ប៉ុន្តែលោក ណេតាន់យ៉ាហ៊ូ នៅតែបានកោតសរសើរលោក ត្រាំ ចំពោះការរួមដៃជាមួយអ៊ីស្រាអែល ក្នុងការវាយប្រហារលើអ៊ីរ៉ង់ ដែលជាគោលដៅរាប់ទសវត្សរ៍របស់នាយករដ្ឋមន្ត្រី ដែលកាន់អំណាចយូរជាងគេរបស់អ៊ីស្រាអែលរូបនេះ៕